過關飛過關飛

常見問題

資料同私隱

賠率同派彩邊度嚟?準唔準?

直接讀香港賽馬會嘅公開網頁資料(賠率同賽果派彩),每分鐘更新。App 唔會經任何第三方伺服器。

顯示嘅數字以馬會官方公佈為準;如果馬會改版面或者延遲,App 會照樣以「更新中/未齊」提示你,唔會用舊數當新數。

我買咗乜、注碼幾多,會唔會上傳?

唔會。條飛只存喺你手機嘅應用私人空間。App 冇你嘅個人資料都照用。

唯一「離開手機」嘅係:如果你開通知,App 只會向推送服務訂閱「場次」主題(例如 ST-20261004-R3)—— 當中冇馬號、冇彩池、冇注碼、冇金額。

咁「帳號」係做咩嘅?

可選功能。開通之後只會保存一個匿名用戶 ID(如你用 Google/Apple 登入,先會有電郵作識別),條飛唔會同步上雲。你可以隨時喺「設定 → 帳號 → 刪除帳號」取消。

用落

「999」係咩意思?

馬會對過千倍(或者未報價)嘅組合會顯示 999。App 一律當下限:Σ 同模擬會標「≥」,唔會當 0,亦唔會當確實數字,避免呃你以為一定收幾多。

點解有啲場次「落飛」灰咗/話今日冇賽事?

馬會嘅即時賠率同排位只服務「當前賽事」。冇賽事嘅日子,或者賽事跑完之後,App 會停用落飛(已結算嘅飛照樣睇得返)。賽日排位一出就會自動開返 —— 就算未報價(顯示 999)一樣落得。

冇網絡嗰陣會點?

App 照樣開得,你已經記錄嘅飛照樣睇得到,只係賠率唔會更新。跑完結算需要網絡(或者等你有網再開,App 會自動補結算)。

點解要通知權限?唔開得唔得?

得 —— 唔開通知,App 一切功能照用,只係跑完嗰陣唔會主動提你。

開咗嘅話,派彩一出就會收到通知(例:「第 6 場:6-2-9(首三名)」),撳入去就見你條飛結算咗幾多。

換手機/重裝 App,啲飛會唔會冇?

因為我哋唔上雲,所以會冇。換機前請用「設定 → 備份」複製一份(經剪貼板,唔使任何權限),新機裝好之後「貼上還原」。

錢同政策

收唔收費?

免費,靠廣告支持(橫幅同偶爾一次嘅全屏廣告)。廣告設定為青少年級別內容,唔會顯示博彩類廣告;亦唔會遮住內容或者彈到你撳錯掣。

你哋會唔會賣貼士/建議我買邊隻?

唔會。「過關飛」係計算同記錄工具:唔接受投注、唔代你落注、唔提供預測或者貼士。所有決定都係你自己嘅。

同香港賽馬會有冇關係?

冇。本應用為獨立開發,與香港賽馬會並無任何關係,亦未獲其授權或認可;唔使用馬會商標。所有資料只係讀取馬會公開網頁。

本應用只適合成年人(18+)使用,賽馬投注涉及風險。

Android 同 iOS 都有?幾時可以下載?

iOS 1.0 已經送交 Apple 審核,批核之後就會喺 App Store 上架;**Android 版已經喺 Google Play(香港)正式上架**(v1.0.10)。

兩邊功能一樣:賽馬同足球都用同一個 App。

足球飛會唔會自動結算?

會。完場之後以馬會官方派彩為準自動判「中/唔中」,半場盤喺半場完嗰刻判。賽事宣佈無效就跟馬會規則當走盤(單場退款;過關當 1 倍)。判唔到嘅情況會寫明原因,唔會亂猜。